Esklerosi Anizkoitzaren Eugenia Epalza Euskal Fundazioak Esklerosi Anizkoitzaren Euskadiko V. Kongresua egin zuen abenduaren 17an eta 18an. “Elkarrekin Aurrera” lelopean, 540 pertsona elkartu ziren Bilboko Euskalduna Jauregian: osasun arloko profesionalak, gaixoak eta senitartekoak.

Hilaren 17ko jardunaldian, erizaintzari eta lehen mailako arretari buruzko bi lan-mahai egin zituzten. Kongresu honetan lehen aldiz agerian geratu da lehen mailako arretako medikuen (Osatzen Familia eta Komunitate Medikuntzako Euskal Elkarteak ordezkatuta) eta neurologoen arteko lankidetza, gaixotasunaren diagnostiko goiztiarra lortzeko, eta Bilbo Protokoloa eratzen denean jarraipena izango duena.

Hilaren 18an, esklerosi anizkoitzaren Espainiako neurologo espezialista nabarmenenetako batzuek jardun zuten, besteak beste, Alfredo Antigüedad, Oscar Fernández, José Antonio García Merino, Txomin Arbizu, Guillermo Izquierdo, Purificación de Castro eta Mar Mendibe Doktoreek.

Kongresuaren aurretik eskainitako prentsaurrekoan, Fundazioak esklerosi anizkoitzak Euskadin bizi duen egoera aztertu zuen, asistentziari, ikerketari eta pazienteen ikuspuntuari dagokienez; argi geratu zen Bizkaiak duela esklerosi anizkoitzaren inguruko ekimenen lidergoa Euskadin: arreta asistentzialik onena Basurto eta Gurutzeetako kontsulta monografikoetan eskaintzen da; ikerketari dagokionez, Esklerosi Anizkoitzaren Ikerkuntzarako lehenengo Unitate Mistoaren sorrera iragarri zuten, EHUk eta Basurtoko Ospitalak osatutakoa eta Carlos Matute irakasleak eta Alfredo Antigüedad Doktoreak zuzenduko dutena, bakoitzak bere esparrutik; eta, Zamudioko Teknologia-Parkeko egoitzatik Koen Vanderbroeck Irakasleak zuzentzen duen Europako Farmakogenomika Sarearen ikerketa genetikoan ematen ari diren aurrerapenen berri eman zuten.

Bestalde, Esklerosi Anizkoitzaren Bizkaiko Elkartea aitzindaria eta erreferentea da Estatuan, gaixotasun neurologiko sendaezin hau duten pertsonei eskaintzen dizkien errehabilitazio- eta gizarte-zerbitzuen kalitateagatik.

JARDUNALDIKO HITZALDIAK